جنوبی وزیرستان لوئر؛ مسجد میں آٹھ سالہ بچہ قتل، چچازاد بھائی قاتل نکلا، پولیس

جنوبی وزیرستان لوئر سٹی تھانے کی حدود میں زیڑی نور کے علاقے میں مسجد کے اندر 8 سالہ بچہ قتل،مبینہ طور پر قاتل چچازاد بھائی نکلا اور ملزم کو گرفتار کر لیا گیا۔

سٹی تھانہ ایس ایچ او عثمان نے بتایا کہ گذشتہ شام آٹھ سالہ مقتول وقاص قوم مغل خیل وزیر کو مبینہ طور پر احمد نامی 18 سالہ نوجوان نے ذبح کر کے قتل کیا۔

ایس ایچ او نے مذید بتایا کہ مقتول اور ملزم آپس میں چچازاد بھائی ہیں، جبکہ مقتول کے والد اور ملزم کے والد بھی سگے بھائی ہیں۔

ایس ایچ او کے مطابق ملزم نے دوران تفتیش ابتدائی طور پر جرم کا اعتراف بھی کر لیا ہے اور ملزم نے دوران تفتیش بتایا کہ اس کی اپنے چچا کے ساتھ ذاتی رنجش تھی۔ ملزم کے مطابق چونکہ اس کے پاس بندوق یا پستول موجود نہیں تھا، اس لیے اس نے اپنے چچا کو نقصان پہنچانے کی نیت سے ان کے کمسن بیٹے کو ذبح کر کے قتل کیا

پولیس کا کہنا ہے کہ بروقت کارروائی اور مؤثر تفتیش کے نتیجے میں مرکزی ملزم کو قانون کی گرفت میں لے لیا گیا، جبکہ واقعے کے محرکات اور دیگر پہلوؤں سے متعلق مزید تفتیش جاری ہے۔