ضلع صوابی میِں دریائے سندھ میں ہنڈ کے مقام پر باپ اور اس کے دو بیٹوں سمیت 5 افراد ڈوب گئے، دریائے سندھ میں لاپتہ 5 افراد کی تلاش دوسرے روز بھی جاری ہے، ریسکیو کی غوطہ خور ٹیمیں مسلسل کوششیں جاری رکھے ہوئے ہیں۔
ریسکیو 1122 کے مطابق دریائے سندھ میں لاپتہ افراد کی تلاش کے لیے تین مختلف مقامات ہنڈ ہوٹلز، میجر عامر فارم ہاؤس اور نبی کلی پر سرچ آپریشن کیا جا رہا ہے۔
دریائے سندھ میں لاپتہ 5 افراد کی تلاش کیلئے جاری آپریشن میں ریسکیو 1122 صوابی کے 25 سے زائد اہلکار حصہ لے رہے ہیں، جو جدید سرچ آلات اور غوطہ خور ٹیموں کی مدد سے دریائے سندھ میں لاپتہ افراد کو تلاش کر رہے ہیں۔
ریسکیو حکام کے مطابق ہنڈ کے مقام پر ڈوبنے والے افراد میں 26 سالہ اویس شامل ہے جس کا تعلق چارسدہ سے بتایا گیا ہے۔
دیگر متاثرین میں 45 سالہ شکیل، 20 سالہ شرجیل اور 16 سالہ خضر شامل ہیں، جن کا تعلق مردان سے ہے، شرجیل اور خضر شکیل کے بیٹے ہیں۔
پانچویں لاپتہ شخص کی شناخت 14 سالہ مشال کے نام سے ہوئی ہے، جس کا تعلق یارحسین سے بتایا گیا ہے۔
