صوبائی ڈیزاسٹر مینجمنٹ اتھارٹی (پی ڈی ایم اے) نے 22 جون تک بالائی خیبرپختونخوا میں بارشوں، تیز ہواؤں اور گرج چمک کی پیش گوئی کرتے ہوئے گلیشیائی جھیلوں کے پھٹنے (GLOF) اور فلیش فلڈ کا الرٹ جاری کر دیا ہے۔
پی ڈی ایم اے کے مطابق اپر و لوئر چترال، سوات، اپر دیر، کوہستان اور مانسہرہ میں شدید بارشوں کے باعث فلیش فلڈ، لینڈ سلائیڈنگ اور گلیشیائی جھیلوں کے پھٹنے کے خدشات موجود ہیں۔
ترجمان پی ڈی ایم اے کے مطابق حساس اضلاع کی ضلعی انتظامیہ کو ہائی الرٹ رہنے اور صورتحال کی مسلسل نگرانی کرنے کی ہدایت کی گئی ہے۔ متعلقہ اداروں کو ممکنہ ہنگامی صورتحال سے نمٹنے کے لیے پیشگی انتظامات مکمل رکھنے کا بھی کہا گیا ہے۔
پی ڈی ایم اے نے ریسکیو اداروں، ہنگامی عملے اور مشینری کو ہر وقت تیار رکھنے کی ہدایت کرتے ہوئے خطرے سے دوچار آبادی کو بروقت آگاہ کرنے اور ضرورت پڑنے پر محفوظ مقامات پر منتقل کرنے کے احکامات جاری کیے ہیں۔
سیاحوں اور مقامی آبادی کو غیر ضروری سفر سے گریز کرنے، دریاؤں، ندی نالوں اور گلیشیائی علاقوں سے دور رہنے کی ہدایت کی گئی ہے۔ عوام سے کہا گیا ہے کہ بارشوں کے دوران تیز بہاؤ والے پانی اور برساتی ندی نالوں کے قریب جانے سے اجتناب کریں۔
