بنگلہ دیش نے دوسرے ٹی 20 میچ میں پاکستان کو دلچسپ مقابلے کے بعد 8 رنز سے شکست دے کر سیریز 0-2 سے اپنے نام کر لی۔
شیرِبنگلہ نیشنل اسٹیڈیم ڈھاکا میں کھیلنے جانے والے میچ میں پاکستان ٹیم 134 رنز کے ہدف کے تعاقب میں 125 رنز بنا کر ہمت ہار گئی۔
صرف 47 رنز پر 7 کھلاڑیوں کے آؤٹ ہونے کے بعد آل راؤنڈر فہیم اشرف نے بھرپور مزاحمت کرتے ہوئے شاندار 51 رنز تو اسکور کیے تاہم وہ ٹیم کو میچ جتوانے اور سیریز بچانے میں ناکام رہے، عباس آفریدی 19 احمد دانیال 17 اور خوشدشاہ نے 13 رنز بنا کر آؤٹ ہوئے۔
پاکستانی بیٹرز 134 رنز کے ہدف کے تعاقب میدان میں اترے تو اس کو پہلا نقصان محض 4 رنز پر اٹھانا پڑا، جب صائم ایوب ایک رن بنا کا رن آؤٹ ہو گئے۔
قومی ٹیم کی طرف سے دیگر بیٹرز بھی ناکام رہے، فخر زمان 8، محمد حارث، حسن نواز اور محمد نواز کھاتہ کھولے بغیر ہی پویلین لوٹ گئے، کپتان سلمان علی آغا صرف 9 رنز بنا کر آؤٹ ہوئے۔
بنگلہ دیش کی جانب سے شرف السلام 3، مہدی حسن اور تنظیم حسن2، 2 وکٹیں حاصل کر کے نمایاں رہے۔
قبل ازیں، بنگلہ دیش نے پہلے بیٹنگ کرتے ہوئے پاکستان کو 134 رنز کا ہدف دیا، بنگلہ دیش کی جانب سے ذاکر علی 55 اور مہدی حسن 33 رنز بناکر نمایاں رہے۔
24 کے مجموعے پر 4 بیٹرز کے پویلین واپس لوٹ جانے کے بعد بنگلہ دیشی بیٹرز پاکستانی باؤلرز پر پلٹ کر وار کیا اور مقررہ 20 اوورز میں مجموعہ کو 133 رنز تک پہنچانے میں کامیاب رہے۔
پاکستان کی جانب سے ڈیبیو کرنے والے فاسٹ باؤلر احمد دانیال، عباس آفریدی اور سلمان مرزا نے 2، 2 وکٹیں حاصل کیں، فہیم اشرف اور محمد نواز ایک، ایک وکٹیں لینے میں کامیاب رہے۔
اس سے قبل، پاکستان نے بنگلہ دیش کیخلاف ٹاس جیت کر پہلے باؤلنگ کرنے کا فیصلہ کیا، پاکستان کی پلیئنگ الیون میں ایک تبدیلی کی گئی ہے، اسپنر ابرار احمد کی جگہ احمد دانیال کو قومی اسکواڈ کا حصہ بنایا گیا
قبل ازیں، پاکستان اور بنگلادیش کے کھلاڑیوں نےگزشتہ روز ڈھاکا میں ایئرفورس کے طیارے کے مقامی اسکول میں گر کر تباہ ہونے کے واقعے میں جاں بحق افراد سے اظہار یکجتی کی اور میچ کے آغاز سے قبل ایک منٹ کی خاموشی اختیار کی۔
