جنوبی وزیرستان لوئر:عوام کا دہشتگردوں کو بھرپور جواب، تین ہلاک

قبائلی مشر ملک سردار علی کے چچازاد بھائی کے اغواء کی کوشش ناکام، تین سو سے زائد افراد پر مشتمل قومی لشکر حفاظت کے لیے پہنچ گیا
تفصیلات کے مطابق گذشتہ روز بعداز نمازِ مغرب جنوبی وزیرستان لوئر کی تحصیل برمل اعظم ورسک درابلے گاوں میں ملک سردار علی کے چچازاد کو ان کے گھر کے قریب سے نامعلوم افراد نے اغوا کرنے کی کوشش کی۔ خاندان کے افراد نے بہادری کا مظاہرہ کرتے ہوئے اس کوشش کو ناکام بنا دیا، جس کے نتیجے میں تین اغوا کار ہلاک اور ایک زخمی ہو گیا۔۔
پولیس زرائع نے وزیرستان ٹائمز کو بتایا کہ اغوا کاروں کا تعلق کالعدم تنظیم سے تھا، ہلاک ہونے والوں میں ضیاء الرحمان، حیدر وزیر، اور ایک افغان شناخت رکھنے والا مارا گیا ہے۔
مقامی ذرائع نے وزیرستان ٹائمز کو بتایا ہے کہ وزیر احمدزائی کرے خیل قبیلے کا تین سو سے زائد افراد پر مشتمل قومی لشکر ملک سردار علی اور خاندان کی حفاظت کے لیے ان کے گھر پہنچ گیا ہے۔
اس موقع پر ملک سردار علی وزیر کرے خیل نے اپنے قبیلےکو واٹس اپ اڈیو پیغام میں کہا ہےکہ وزیر کرے خیل قبیلے کے قومی لشکر نے علاقہ کو اپنے کنٹرول میں لے لیا ہے، عوام فکر نہ کرے، انہوں نے مذید کہا ہے کہ زندگی میں اس قسم کے واقعات آتے رہتے ہیں۔ اپنے گھر کے آس پاس کا پورا علاقہ قومی لشکر کے مکمل کنٹرول میں ہے۔
انہوں نے مزید کہا، نہ ہم نے کوئی جرم کیا ہے اور نہ ہی کسی کے کام میں مداخلت کی ہے۔ اگر اس کے باوجود بھی کوئی گھر پر دھاوا بولنے کی کوشش کرتا ہے، تو ہم آخری سانس تک غیرت سے ان کا مقابلہ کریں گے۔